वैज्ञानिक डा.महावीर पुन आत्मवृतान्त पुस्तक ‘महावीर पुन सम्झना सपना र अविरल यात्रा’ बिक्री अभियानका क्रममा यति बेला झापामा छन् ।
उनी वीरगञ्जस्थित कृषी औजार कारखाना सञ्चालनका लागि पुस्तक बिक्री गर्दै देश दौडाहमा निस्किने क्रमममा झापा आइपुगेका हुन् ।
यहि क्रममा उनले झापाको बिर्तामोडमा अवस्थित आर्दश स्कुल अफ मेनेजमेन्टका विद्यार्थी तथा व्यवस्थापनलाई पुस्तक बिक्रि गरेका छन् । उनले एउटा महत्वपूर्ण लक्ष्य र योजनाका साथ आफु पुस्तक बिक्रि गर्दै देश दौडाहमा निस्किएको बताए ।
उक्त पुस्तक बिक्रीका लागि ४३ औं जिल्लाका रुपमा उनी झापा आएका हुन् । देशका ७७ वटै जिल्लामा पुस्तक वितरण अभियान लैजाने उनले बताएका छन् ।
व्यक्तिगत लाभका लागि नभई राष्ट्रको कृषि औजार कारखाना सञ्चालनका लागि आफू लागि परेको उनले स्पष्ट पारे । विरगन्जको कृषि औजार कारखानालाई पुनर्जीवित गर्ने अभियानका लागि पुस्तक बेचेर हिँडिरहेको विद्यार्थी समक्ष उनले बताए । उनले हालसम्म २ लाख १५ हजार पुस्तक बिक्रि गरेको र सो बापत १२ करोड रुपैंया कलेक्सन भएको बताएका छन् ।
पुनले आफैंले लेखेको ‘सम्झना, सपना र अविरल यात्रा’ नामक पुस्तकमा उनका भोगाइ समेटेका छन् । उनको जीवनीका मुख्य अंश पुस्तकमा समेटिएको उनले बताए ।
कृषि औजार कारखानाको मर्मत गरिसकिएको र त्यसलाई सञ्चालनमा ल्याउन रकम अभाव भएकाले किताब बेच्दै पुन हिंडिरहेको अवस्थालाई मध्यनजर गर्दै सामाजिक उत्तरदायित्व वहन गर्दै आर्दश स्कुलले पनि पुस्तक खरिद गरेर सहयोग गरेको आर्दश स्कुल अफ मेनेजमेन्टका निर्देशक संजोग खरेलले बताएका छन् ।
