झापाको हल्दीबारी गाउँपालिकाले पूर्ण साक्षरता पालिका घोषणा गरेको छ ।
झापाका १५ वटा पालिका मध्ये पूर्ण साक्षरता पालिका घोषणा गर्ने पहिलो पालिका हल्दीबारी बनेको हो ।
पालिकाको कार्यालयमा आज पूर्ण साक्षरता पालिका घोषणासहित चारवटा कार्यक्रम भएका छन् । पालिकाले पूर्ण साक्षरता पालिका घोषणासहित गाउँ शिक्षा योजनाको सार्वजनिकिकरण, पूर्ण खोप पालिका सुनिश्चितता दिगोपना घोषणा र शैक्षिक सत्र २०८१ को एसईईमा उत्कृष्ट नतिजा प्राप्त गर्ने विद्यार्थीहरुलाई सम्मान गरेको छ ।
२०८१ को एसईईमा उत्कृष्ट नतिजा ल्याउने पालिकाका सामुदायिक तथा संस्थागत विद्यालयका ३२ जना विद्यार्थीलाई नगद, प्रमाणपत्रसहित सम्मान गरिएको थियो ।
हल्दीबारी गाउँपालिकाका अध्यक्ष रविन्द्रप्रसाद लिङ्देनको अध्यक्षतामा भएको कार्यक्रममा प्रतिनिधिसभा सदस्य तथा राप्रपाका अध्यक्ष राजेन्द्र लिङ्देनको प्रमुख आतिथ्य रहेको थियो ।
प्रमुख अतिथि सांसद लिङ्देनले कार्यक्रमलाई सम्बोधन गर्दै सवैभन्दा वढी प्राथमिकता दिने क्षेत्र शिक्षा र स्वास्थ्य रहेको बताए ।
प्रमुख प्रशासकीय अधिकृत मानबहादुर बन (महेन्द्र) ले स्वागतसहित कार्यक्रमको औचित्यमाथि प्रकाश पारेको कार्यक्रममा वडा नं.२ की कार्यवहाक वडाध्यक्ष रचना कुलुङले शुभकामना मन्तव्य राखेकी थिइन् ।
पालिकाका स्वास्थ्य शाखा प्रमुख पुस्कर निरौलाले पालिको स्वास्थ्यका बिषयमा जानकारी गराएको कार्यक्रममा शिक्षा शाखा प्रमुख जनककुमारी राईले पालिकाको शिक्षाका बारेमा जानकारी गराएकी थिइन् ।
उक्त कार्यक्रममा वडाध्यक्षहरु, कार्यपालिका सदस्य तथा जनप्रतिनिधि, राजनीतिक दलका प्रमुख तथा प्रतिनिधि, स्थानीय संघसंस्थाका प्रमुख तथा प्रतिनिधि, पालिकाका कर्मचारीलगायतको बाक्लो उपस्थिति रहेको कार्यक्रमको सञ्चालन पालिकाका योजना शाखा प्रमुख राजन न्यौपाले गरेका थिए ।
