¥याडिकल लाईट नेपाल प्रालि धरानद्वारा आयोजित कोशी प्रदेशस्तरीय एसईई स्पिकर २०८१ सिजन-५ को उपाधि झापाका आबिष्कार राउतले जितेका छन् ।
सुनसरी उद्योग वाणिज्य सङ्घको सभाहलमा सम्पन्न भव्य ग्रान्ड फिनालेमा मेचीनगरको होली बेल इङ्लिस सेकेन्डरी स्कुलका आबिष्कारले नगद ५५ हजार रुपैयाँ, ट्रफी र प्रमाणपत्रसहित उपाधि प्राप्त गरेका हुन् ।
प्रतियोगितामा पब्लिक हाईस्कुल धरानकी जिज्ञासा भट्टराई फस्ट रनरअप बन्दै नगद २५ हजार, ट्रफी र प्रमाणपत्र प्राप्त गरिन् । ब्लुम नेपाल स्कुल इटहरीका शुभम पोख्रेलले सेकेन्ड रनरअपको स्थान हासिल गर्दै १० हजार नगदसहित ट्रफी र प्रमाणपत्र प्राप्त गरे भने जेम सेकेन्डरी स्कुलकी सन्जिना राईले थर्ड रनरअपको उपाधि हात पार्दै ५ हजार नगद, ट्रफी र प्रमाणपत्र प्राप्त गरेकी छन् ।
कार्यक्रममा विजेता तथा उपविजेताहरुलाई एन-प्याब्सनका केन्द्रिय उपाध्यक्ष एवं होली गार्डेन स्कुलका प्रिन्सिपल राजेन्द्र गुरुङ, निर्णायकद्वय टंक भट्टराई र अशोक पोख्रेल, सुनाखरी एकेडेमीका प्रिन्सिपल मिलनकुमार राई, सरस्वती निकेतन बोर्डिङ स्कुलका प्रिन्सिपल बमबहादुर बिश्वकर्मा लगायतले पुरस्कार र प्रमाणपत्र वितरण गरेका थिए ।
अन्तिम चरणमा पुगेका १५ जना प्रतियोगीहरूलाई “बढ्दो भ्रष्टाचार र देशको अवस्था”, “लागूऔषधको प्रयोग: चुनौती र समाधान”, “युवा पलायन: राष्ट्र निर्माणमा चुनौती”, “बढ्दो सवारी दुर्घटना” र “डिजिटल क्रान्तिले जीवनशैलीमा ल्याएको परिवर्तन” जस्ता पाँच महत्वपूर्ण शीर्षकमध्ये गोला प्रणालीद्वारा छानिएको विषयमा बोल्ने अवसर प्रदान गरिएको ¥याडिकल लाईट नेपालका अध्यक्ष तिर्थ कार्कीले जानकारी दिए ।
