झापाको बिर्तामोड नगरपालिका-२ स्थित उज्यालो चारपानेको अध्यक्षमा इशान भट्टराई चयन भएका छन् ।
बाल क्लबको सोमबार भएको पुनर्गठन तथा तेस्रो अधिवेशनबाट भट्टराईको नेतृत्वमा १५ सदस्यीय नयाँ कार्यसमिति सर्वसम्मत चयन गरिएको हो ।
त्यस्तै उपाध्यक्षमा समृद्धि खड्का र शोभित उप्रेती, सचिवमा, कृष्टिना चौधरी, सह-सचिवमा उत्सल बराल, कोषाध्यक्षमा प्रियन्सु ढकाल र अन्य सदस्यहरूमा सात जना चयन भएका छन् ।
क्लबकी अध्यक्ष एलिजा भट्टराईको अध्यक्षतामा भएको कार्यक्रमका प्रमुख अतिथि बिर्तामोड नगरपालिका वडा नं.२ वडाध्यक्ष किशोर कुमार पौडेलले बालबालिकाको नेतृत्व विकास, सिर्जनशीलता अभिवृद्धि र सामाजिक जिम्मेवारी बोधका लागि बाल क्लबहरू महत्वपूर्ण भूमिका खेल्ने बताए । उनले क्लबका आगामी गतिविधिमा वडा कार्यालयको सहयोग निरन्तर रहने प्रतिबद्धता व्यक्त गरेका थिए ।
समय सञ्जालको सहजीकरण र बिर्तामोड नगरपालिका वडा नं.२ को सहयोगमा भएको कार्यक्रममा बालबालिका तथा शिक्षा सञ्चार मञ्चका संयोजक सरोज पौडेल, बिर्तामोड-२ का विभिन्न विद्यालयका फोकल पर्सन शिक्षकहरू, अभिभावक, शिक्षक, समाजसेवी, पूर्व पदाधिकारी तथा बालबालिकाको समेत उपस्थिति रहेको थियो ।
कार्यक्रममा बोल्दै बालबालिकाशिक्षा तथा सञ्चार मञ्चका संयोजक सरोज पौडेलले बालबालिका समाजको उज्यालो भविष्य भएको बताए । उनले बाल बालिकाको नेतृत्व विकास, अधिकार संरक्षण र सिर्जनात्मक अभिवृद्धि गर्न यस्ता बाल क्लबहरू अत्यन्त महत्वपूर्ण रहेको बताएका छन् ।
कार्यक्रममा स्वागत मन्तव्य, गायन प्रस्तुति, अनुभव बाँडफाँड तथा क्लबको विगत र आगामी योजनाबारे चर्चा गरिएको थियो । नवगठित समितिले बाल अधिकार संरक्षण, सिर्जनात्मक तथा चेतनामूलक कार्यक्रमहरू सञ्चालन गर्दै बालबालिकाको नेतृत्व विकास र सामाजिक चेतनामा जोड दिने प्रतिबद्धता जनाएका छन ।
