परराष्ट्रमन्त्री डा.आरजु राणा देउवाले इजरायलमा नेपालीको विवरण संकलनका लागि बनाइएको अनलाइन पोर्टलमा ८ सय ८५ जनाले नाम दर्ता गराएका छन् ।
प्रतिनिधि सभाको सोमबारको बैठकमा बोल्दै मन्त्री राणाले सरकारले इजरायल-इरानबीच युद्धका कारण नेपाल फर्कन चाहने नेपालीलाई अनलाइन पोर्टलमार्फत विवरण लिने काम गरिरहेको र हालसम्म ८८५ जनाले आफूहरूलाई उद्धार गरेर नेपाल फर्काउन नाम टिपाएका उनले जानकारी दिइन् ।
इजरायल-इरानबीच उत्पन्न द्वन्द्वका कारण सो क्षेत्र तथा अन्य प्रभावित मुलुकहरूमा रहेका नेपाली नागरिकहरूको सुरक्षालाई सरकारले प्राथमिकतामा राखेको उनको भनाइ थियो ।
त्यस्तै परराष्ट्रमन्त्री देउवाले इरानमा रहेका नेपालीको उद्धार प्रक्रिया सुरु भएको बताएकी छन् ।
उनले उद्धारका लागि भारत सरकारलाई आग्रह गरिएको बताइन् ।
“इरानमा रहेका १६ जना नेपालीलाई उद्धार गरिदिन भारत सरकारलाई अनुरोध गरिएकामा इरानस्थित भारतीय दूतावासको सहयोगमा ११ जनालाई नेपाल फर्काउने प्रक्रिया सुरु भएको छ,” परराष्ट्रमन्त्री राणाले बताइन् ।
उनका अनुसार ११ जना भोलि नै भारत आइपुग्दै छन् । बाँकी पाँचजना अध्यागमन कानुनका कारण थुनामा रहेकाले कागजी प्रक्रिया पूरा गरेर स्वदेश फर्काउन मन्त्रालयले कतारको दोहास्थित नेपाली दूतावासमार्फत पहल गरिरहेको उनको भनाइ छ ।
सरकारले युद्ध सुरु भएदेखि नै एड्भाइजरी मार्फत इजरायल तथा इरानमा रहेका नेपाली नागरिकलाई विशेष सुरक्षा सतर्कता अपनाउन आग्रह गर्दै आएको मन्त्री राणाको भनाइ छ ।
