झापाको बिर्तामोड नगरपालिकाका प्रवक्ता तथा वडा नं.१ का वडाध्यक्ष अग्निप्रसाद पाण्डेले २०८३ साउन १ गते भित्र वडा नम्बर १ लाई बालमैत्री वडा घोषणा गर्ने बताएका छन् ।
बिर्तामोडलाई बालमैत्री पालिका घोषणा गर्ने अभियान अन्तर्गत आज वडा नं.१ को कार्यालयमा एक दिवसीय अभिमुखीकरण कार्यक्रममा बोल्दै उनले आगामी दिनमा बाल श्रम तथा बाल दुव्यवहारमुक्त वडा निर्माण गर्ने प्रतिवद्धता जनाएका हुन् ।
बिर्तामोड नगरपालिका महिला, बालबालिका तथा सामाजिक कल्याण शाखाको आयोजनामा भएको कार्यक्रममा बालमैत्री पालिका घोषणासम्बन्धी जानकारी र स्थानीय शासनको भूमिकाबारे छलफल गरिएको छ ।
वडाअध्यक्ष पाण्डेको अध्यक्षतामा भएको कार्यक्रममा =प्रशिक्षक भरत कुसुवारले सहभागीहरूलाई बाल अधिकार, सुरक्षाको उपाय, शिक्षा, स्वास्थ्य तथा बालमैत्री संरचनाको आवश्यकता विषयमा प्रशिक्षण प्रदान गरेका थिए ।
शाखा अधिकृत युगकुमारी भट्टराईले अहिलेसम्म नगरका ६ वटा वडामा यस्तो कार्यक्रम सम्पन्न भइसकेको र बाँकी रहेका वडा नं.३, ४, ५ र ७ मा समेत छिट्टै कार्यक्रम सञ्चालन हुने जानकारी दिए ।
