झापाको शिवसताक्षी नगरपालिका-९ मा रहेको सतासी आधारभूत विद्यालयका प्रधानाध्यापक ज्ञानेन्द्रबहादुर बिकले छुट्टीपछि सिटी सफारी कुदाएर विद्यार्थीलाई घर-घर पुर्याउने गरेका छन् । पारिश्रमिक नलिई अतिरिक्त समय खर्च गरेर उनले गरेका यो कामले शिक्षक पेशामा समर्पण र सेवाको नयाँ उदाहरण प्रस्तुत गरेको छ।
विद्यालयमा विद्यार्थी घट्दै गएपछि स्थानीय वडाले झण्डै ३ लाख ५० हजार रुपैयाँ बराबरको सिटी सफारी दिएको थियो । तर त्यसलाई कसले चलाउने भन्ने अन्योल भएको बेला विद्यालयका शिक्षक ओम आचार्यले पहिलोपटक सिटी चलाएर नगरपालिकाबाट स्कुलसम्म ल्याए । सुरुवातमा डर लागे पनि केही बेर अभ्यास गरेपछि उनी सहजै चलाउन थाले । सुरुका केही हप्ता बिहान-बेलुका आचार्यले नै विद्यार्थी ल्याउने–पुर्याउने गरेका छन् ।
एक महिनादेखि भने बिहान विद्यार्थी ल्याउने जिम्मा प्रधानाध्यापक बिकका भान्जाले सम्हालिरहेका छन । जसले दैनिक १०० रुपैयाँ पारिश्रमिक पाउँछन् । बेलुका भने बिक आफैं सिटी कुदाउँछन् र विद्यार्थीलाई घर-घर पुर्याउँछन् । उनी भन्छन्, ‘विद्यार्थीको प्रगति र व्यवहारबारे अभिभावकसँग प्रत्यक्ष कुरा गर्न पाउँदा साँचिकै सन्तुष्टि मिल्छ । यस्तो सेवा गर्न पाउँदा जीवन नै सार्थक लाग्छ ।’
विद्यालयबाट छुट्ने सिटी सफारी वडाको याङया चोकदेखि वीर दिल चोक, नहरचोक, जनता आवास क्षेत्र, शिवचोक हुँदै दुधे-शिवगञ्ज सडकबाट विद्यालय पुग्छ। एक चक्करमा १६ जना विद्यार्थी सवार हुन्छन् भने अन्य २७ जना अझै पनि पैदलै विद्यालय आउँछन् ।
प्रधानाध्यापक बिकको पहलप्रति अभिभावकहरू पनि खुसी छन् । ‘हाम्रो छोराछोरीलाई प्रधानाध्यापक आफैंले घर पुर्याइदिँदा कतै अलमलिन्छन् कि भन्ने चिन्ता हुँदैन,’ स्थानीय अभिभावक रामबहादुर तामाङले भने ।
शिक्षक आन्दोलनका कारण यस वर्ष केही विद्यार्थी निजी विद्यालयतिर गएका थिए । तर सिटी सफारी सेवा र गुणस्तरीय शिक्षाका कारण विद्यालयले अघिल्लो वर्षको विद्यार्थी संख्या जोगाउन सफल भएको छ । प्रधानाध्यापक बिक भन्छन्, ‘अर्को वर्ष ५० भन्दा बढी नयाँ विद्यार्थी थप्ने लक्ष्य लिएका छौँ ।’
विद्यालयका अन्य शिक्षकहरू पनि कहिलेकाहीँ पालो गरेर सिटी चलाउने गरेका छन् । विद्यालयकी शिक्षिका शारदा सुब्बा पनि सिटी सफारी चलाउने तालिम लिइरहेकी छन् । साँझ ६ बजेसम्म विद्यालयकै काममा खटिने बिकको सेवाभाव र पहलले सरकारी विद्यालय पनि समर्पण र नवाचारको पर्याय बन्न सक्छ भन्ने उदाहरण सतासी आधारभूत विद्यालयले देखाएको छ ।
