झापाको बिर्तामोड-५ मा रहेको न्युटन्स एजुकेसन एकाडेमीले अभिभावक तथा शिक्षक प्रशिक्षण कार्यक्रम सुरु गरेको छ ।
बिर्तामोड नगरपालिकाका उपप्रमुख नगेन्द्रप्रसाद संग्रोलाले एक कार्यक्रमका बीच बिहीबार कार्यक्रमको उद्घाटन गरेका हुन् ।
राष्ट्रिय तथा अन्तर्राष्ट्रिय स्तरमै ख्याति प्राप्त वरिष्ठ प्रशिक्षक मनोपरामर्शदाता तथा उत्प्रेरक वक्ता ईश्वर श्रेष्ठले प्रशिक्षण दिएका छन् ।
पहिलो चरणको कार्यक्रम अन्तर्गत बिहीबार कक्षा नर्सरीदेखि कक्षा ५ सम्म अध्ययनरत विद्यार्थीका अभिभावकहरुलाई एकै ठाउँमा राखेर प्रशिक्षण दिइएको हो ।
अभिभावक विद्यार्थीको पहिलो पाठशाला भएकाले अभिभावकलाई केही नयाँ ज्ञान दिन र उनीहरूमा देखिएका समस्या समाधानका लागि कार्यक्रम प्रभावकारी हुने विश्वासका साथ कार्यक्रमको थालनी गरिएको न्युटन्स एजुकेसन एकेडेमीका प्रिन्सिपल देवेन्द्र हुमागाईले बताए ।
विद्यार्थी र अभिभावकमा हुने खराब आचरण अन्त्य गरेर असल बानी व्यवहारको सुरुवात, जिम्मेवारीपनको विकासमा कार्यक्रमले थप टेवा पुग्ने उनको भनाइ छ ।
कार्यक्रमका प्रमुख अतिथि बिर्तामोड नगरका नगर उपप्रमुख नगेन्द्रप्रसाद संग्रौलाले विद्यार्थीलाई हौसला प्रदान गर्दै अभिभावकलाई थप जिम्मेवारी बनाउन यस कार्यक्रमले थप टेवा पुग्ने बताए ।
त्यसैगरी आज कक्षा ६ देखि १० सम्मका विद्यार्थीका अभिभावकलाई र शनिबार भने शिक्षकलाई अभिमुखीकरण प्रदान गरिने विद्यालयले जनाएको छ ।
विद्यालय व्यवस्थापन समितिका अध्यक्ष गोपी प्रसाईंको अध्यक्षतामा भएको कार्यक्रममा बिर्तामोड नगरपालिका-५ का वडाध्यक्ष रोहित प्रसाई, प्याब्सन झापाका वरिष्ठ उपाध्यक्ष एच के पाठक लगायतले शुभकामना मन्तव्य राखेका थिए ।
विद्यालयका प्रिन्सिपल देवेन्द्र हुमागाईले स्वागतसहित कार्यक्रमको औचित्यमाथि प्रकाश पारेको कार्यक्रमको सञ्चालन सञ्चारकर्मी लीला अनमोलले गरेकी थिइन् ।
