बाह्रदशी जेसीजले सामुदायिक विद्यालयमा अध्ययनरत १७ जना विद्यार्थीको अभिभावकत्व ग्रहण गरेको छ ।
जेसीजले अति विपन्न विद्यार्थीको अध्ययनमा सहजताका लागि अभिभावकत्व ग्रहण गर्दै शैक्षिक सामग्री समेत वितरण गरेको हो ।
बाह्रदशी गाउँपालिकाको कार्यालयमा आयोजित कार्यक्रमकाबीच १६ वटा सामुदायिक विद्यालयका विद्यार्थीलाई प्रति विद्यार्थी चार हजार पाँच सय रुपैयाँ बराबरको स्कूल व्याग सहितका स्टेशनरी सामग्री प्रदान गरिएको थियो ।
गाउँपालिका अध्यक्ष देविन्द्रप्रसाद चम्लागाई, प्रमुख प्रशासकीय अधिकृत जनार्दन निरौलासहितले उनीहरुलाई नगद एक हजार रुपैयाँ सहित स्टेशनरी सामग्री प्रदान गरेका थिए ।
बाह्रदशी जेसीजले सन २०२३ बाट यो कार्यक्रम सञ्चालन गर्दै आएको छ । सामुदायिक विद्यालयमा अध्ययनरत विद्यार्थीको अभिभावकत्व ग्रहण गर्दै प्रत्येक वर्ष उनीहरको पढाई खर्च व्यहोर्दै आएको जेसीजले यो वर्ष पनि सो कार्यक्रमलाई निरन्तरता दिएको हो । अभिभावकत्व ग्रहण गरिएका बालबालिकालाई उच्च शिक्षा अध्ययनमा समेत जिम्वेवारी लिइने बताइएको छ ।
जेसीजले गरेको कार्यक्रमको प्रशंसा गर्दै गाउँपालिका अध्यक्ष चम्लागाईले समेत दुई जना बालवालिकाको अभिभावकत्व ग्रहण गरेका छन् । उनले अमृत माध्यमिक विद्यालय भागुडुब्बामा अध्ययनरत विद्यार्थी मनिष राजवंशी र सुन्दरपूर आधारभूत विद्यालयका विद्यार्थी आशिका गणेशको अभिभावकत्व ग्रहण गरेका हुन् ।
त्यस्तै बाह्रदशी जेसीज सन २०२५ का अध्यक्ष तीर्थप्रसाद काफ्लेले फूलवारी माविका विद्यार्थी पद्मा राजवंशीको अभिभावकत्व ग्रहण गरेका छन् । एक सदस्य एक अभिभावक भन्ने नारा लिएको जेसीजले सुरु गरेको कार्यक्रम अन्तरगत जेसीजका संस्थापक अध्यक्ष विगम श्रेष्ठ-डिकप्रसाद आचार्य, पूर्व अध्यक्ष पुष्पलाल धमला-सुहानी खातुन, पूर्व अध्यक्ष लक्ष्मी प्रसाद उप्रेती-सविता माझी, निर्वतमान अध्यक्ष खगेन्द्र सुवेदी-आशिका खवासको अभिभावकत्व ग्रहण गरेका हुन् ।
त्यस्तै राजु अधिकारी-अनुज गिरी, विश्वास गौतम-अम्विका सुवेदी, डिककुमार कटुवाल-लुकेश राजवंशी, सदिक्षा खड्का -जशोदा कुर्मी, पुष्प भभट्टराईलाई-सुशील लिम्बू, गोकुल घिमिरे-दामिनी शाह, गोपाल उप्रेती-अस्मिता हस्दा, प्रकाश फुयाल-रिदिमा राजवंशी, नवराज दाहाल-अनिता राजवंशी र नवीन त्रिताल-सृजना सोरेनको अभिभावकत्व ग्रहण गरेका छन् ।
बाह्रदशी जेसीज सन २०२५ का अध्यक्ष तीर्थ प्रसाद काफ्लेको अध्यक्षतामा भएको कार्यक्रमका प्रमुख अतिथि गाउँपालिका अध्यक्ष चम्लगाईले बाह्रदशी जेसीजले उत्कृष्ठ र रचनात्मक कार्य गरेको भन्दै प्रशंसा व्यक्त गरेका थिए ।
उक्त कार्यक्रममा बाह्रदशी गाउँपालिकाका प्रमुख प्रशासकीय अधिकृत निरौला, बाह्रदशी जेसीजका निवर्तमान अध्यक्ष खगेन्द्र सुवेदी, नेपाल जेसीजका कार्यकारिणी गणेश सापकोटा, पशुपति माध्यमिक विद्यालयका प्रधानाध्यापक थीरकुमार दाहाल (कुमार), बाह्रदशी गाउँपालिका-४ का वडाध्यक्ष महताव आलम लगायतले शुभकामना मन्तव्य राखेका थिए ।
राजु अधिकारीले स्वागत गरेको कार्यक्रममा आस्था बाचन विश्वास गौतमले गरेका थिए । जेसीजको मिसन भिजन गोपाल उप्रेतीले गरेका थिए भने कार्यक्रमको सञ्चालन बाह्रदशी जेसीजकी महासचिव सदिक्षा खड्काले गरेकी थिइन् ।
दुई खण्डमा गरिएको कार्यक्रम अन्तरगत भितेपात्रो विमोचन विश्वास गौतमको संयोजकत्वमा भएको थियो । अभिभावकत्व ग्रहण कार्यक्रम राजु अधिकारीको संयोजकत्वमा भएको हो ।
