यूएईलाई हराउँदै नेपाल विश्वकपको ग्लोबल छनोटमा

संवाददाता/ सोमबार, जेठ ०६, २०८२

यूएईलाई हराउँदै नेपाल आईसीसी महिला टी-२० विश्वकपको ग्लोबल छनोटमा पुगेको छ ।

नेपाली महिला टोली पहिलो पटक टी-२० विश्वकपको ग्लोबल छनोटमा पुगेको हो ।

एशिया छनोटको ‘सुपर-थ्री’ मा यूएईले दिएको १ सय १५ रनको लक्ष्य नेपालले ३ बल बाँकी छँदा ५ विकेट गुमाएर भेटायो । नेपालकी कप्तान इन्दु वर्माले नटआउट ३०, रुबिना क्षेत्रीले २३ रन बनाइन् । यूएईकी मिचेल बोथा, सुरक्षा कोटी, वैष्णवी महेश र ईशा वजाले १-१ विकेट लिएका थिए ।

यसअघि थाइल्यान्डको बैंककमा टस हारेर ब्याटिङको निम्तो पाएको यूएईले २० ओभरमा ७ विकेट गुमाएर १ सय १४ रन बनाएको थियो । यूएईकी कप्तान इशा वजाले सर्वाधिक ३९ रन बनाइन् । नेपालकी मनिषा उपाध्यायले ४ विकेट लिएकी थिइन् ।

नेपालले अब सुपर-थ्रीको दोस्रो खेलमा भोलि थाइल्यान्डसँग खेल्नेछ । थाइल्यान्ड पनि यूएईलाई हराउँदै ग्लोबल छनोटमा पुगिसकेको छ ।