झापाको मेचीनगर नगरपालिकाको सहयोगमा धुलाबारी माविले सहिद वीरेन राजवंशी छात्रवृति रकम वितरण गरेको छ ।
विद्यालयको सभाहलमा शुक्रबार वीरेन राजवंशी छात्रवृति तथा विद्यालयको गीत लोकार्पण कार्यक्रममा १३० जना विद्यार्थीहरुलाई छात्रवृति रकम वितरण गरिएको हो । कक्षा-११ र १२ का विद्यार्थीहरुलाई जनही ८ हजार रुपैयाँका दरले रकम वितरण गरिएको छ ।
कार्यक्रमका प्रमुख अतिथि एवम् सोही विद्यालयका पूर्व विद्यार्थी समेत रहेका मेचीनगर नगरपालिकाका प्रमुख गोपालचन्द्र बुढाथोकीले छात्रवृति रकम वितरण गरेका हुन् ।
नगरपालिकाले प्रत्येक वर्ष सहिद वीरेन राजवंशी र वीपी कोइरालाको नाममा विद्यार्थीलाई छात्रवृति रकम वितरण गर्दै आएको छ ।
उक्त अवसरमा विद्यालयको गीत लोकार्पण गरिएको छ । प्रमुख अतिथि बुढाथोकीले विद्यालयको गीत डिजिटल कम्युटरमा थिचेर लोकार्पण गरेका थिए ।
उक्त गीतमा शिक्षक मिलनकुमार ढुंगानाको शब्द रचना, भविन ढुंगाना संगीत, भानुभक्त ढकाल, रोशा फुयल, सुनिता तामाङ र भविन ढुंगानाको स्वर, कुशलसिंह नाइलको एरेन्ज, श्याम बागदासको मिक्सिङ, डो रे मी स्टुडियो काठमाडौँको रहेको छ ।
धुलाबारी माविका व्यवस्थापन समिति अध्यक्ष गणेशविक्रम नेम्बाङको अध्यक्षतामा भएको कार्यक्रममा प्रमुख अतिथि नगरप्रमुख बुढाथोकीले छात्रवृतिको रकमले विद्यार्थीलाई शिक्षाप्रति हौसला प्रदान गर्ने काम गरेको बताए । उनले विद्यालयको गीतलाई विहानको भजन बजाए जसरी बजाउन आग्रह गरेका थिए ।
कार्यक्रममा नगरपालिकाका शिक्षा शाखा प्रमुख होमनाथ भण्डारी, सामाजिक विकास समिति संयोजक ह्दय राजवंशी, धुलाबारी मावि पूर्व विद्यार्थी समाजका अध्यक्ष ध्रुब कनाल, प्रधानाध्यापक महेन्द्रविलास लुइटेल, गीतका शब्द रचनाकार शिक्षक ढुंगाना लगायतले शुभकामना मन्तव्य व्यक्त गरेका थिए ।
सहायक प्रधानाध्यापक तेजप्रसाद चौलागाईं मन्तव्यबाट स्वागत गरेको कार्यक्रमको सञ्चालन शिक्षक रमेश दाहालले गरेका थिए ।
