झापाको बिर्तामोड-२ चारपानेमा अवस्थित साङ्गवेद संस्कृत माध्यमिक विद्यालय तथा विवेकाश्रममा विद्यार्थीको आर्कषण बढ्दै गएको छ । यसै वर्ष मात्र विद्यालयमा ५० जना नयाँ विद्यार्थी भर्नाका छन् ।
कक्षा ४ देखि १२ सम्म पठनपाठन हुने विद्यालयमा ३१० जना विद्यार्थीहरु अध्ययनरत तथा १८ जना शिक्षक-कर्मचारी कार्यरत रहेका छन् ।
कोशी प्रदेशसहित भारतबाट समेत विद्यार्थीहरु अध्ययनका लागि आउने गरेका विद्यालयका प्रधानाध्यापक छवि रेग्मीले जानकारी दिए ।
संस्कृत माध्यमबाट पढाइ हुने विद्यालयमा आवासीय माध्यमबाट अध्ययन गर्ने विद्यार्थीले वार्षिक रुपमा ७२०० रुपैँया तिर्ने गरेका प्रधानाध्यापक रेग्मीले बताए । खान, बस्न, पठनपाठन गर्न, खेलकुद, परीक्षा शुल्क त्यसभित्र पर्ने गरेको छ । आवासीयमा नबस्ने विद्यार्थीले वार्षिक रुपमा २८०० मात्र तिर्दा पुग्ने प्रधानाध्यापक रेग्मी बताउँछन् ।
झापाकै उत्कृष्ट संस्कृत विद्यालयका रुपमा स्थापित विद्यालयमा गत वर्षको एसईईमा ९३ प्रतिशत विद्यार्थीहरु उत्तीर्ण भएका थिए ।
बिर्तामोड नगरपालिकाले संस्कृतिक विद्यालयलाई व्यवस्थित र राम्रो बनाउन विभिन्न तरिकाले सहयोग गर्दै आएको छ । बालबालिकाको विकासका लागि बाल क्लब, स्काउटहरु समेत गठन गरिएको प्रधानाध्यापक रेग्मीले बताए ।
स्थानीय जनप्रतिनिधिहरुले प्रत्यक्ष रुपमा उपस्थित भएर विद्यालयलाई व्यवस्थित बनाउन चासो राखिरहेका कारण विद्यालयले फड्को मारिरहेको प्रधानाध्यापक रेग्मीले बताए ।
पछिल्लो समय संस्कृत पढ्ने विद्याथीहरुको संख्या दिनप्रतिदिन घट्दै गएको अनुमान गरिए तापनि साङ्गवेदमा विद्यार्थीहरुको संख्या उल्लेख रहेको छ ।
विद्यालयमा टाढा-टाढाबाट विद्यार्थीहरु आएर पढ्न चाहै पनि भौतिक संरचनाको अभावका कारणले गर्दा आवासीय रुपमा बसेर विद्यार्थीहरुले पढ्न नपाएको अवस्था रहेको र त्यसका लागि वडा कार्यालयले समन्वय र पहल गरिरहेको वडाध्यक्ष किशोरकुमार पौडेलले जानकारी दिए ।
