बिर्तामोडमा अवस्थित न्युटन्स् एजुकेसन एकेडेमीकी मिनु शिवाकोटी जसले २२ वर्ष लामो समय विद्यालयमा बिताइन् र यो वर्षबाट अवकाश लिएकी छिन् । उनले विद्यालयबाट अवकाशसँगै आफूलाई जिवीकोपार्जन गर्न वा केही व्यवसायिक बन्न सक्ने गरी ठूलो रकम प्राप्त गरेकी छन् ।
विद्यालयले विभिन्न शिर्षक अन्तरगत २० लाख बढी रकम प्रदान गरेको आज बिर्तामोडमा प्रिन्सिपल देवेन्द्र हुमागाईं र अवकाश प्राप्त शिक्षक शिवाकोटीको भेटघाटमा जनाइएको हो ।
न्युटन्स बाल क्लबको फोकल पर्सन समेत रहेकी शिवाकोटीले अवकाश कोषबाट साढे ८ महिनाको तलब ३ लाख ४७ हजार ६५०, नागरिक लगानी कोषबाट ८ लाख ३५ हजार १८४, कर्मचारी संचय कोषबाट ७ लाख ५२ हजार र शिक्षक कल्याण कोषबाट ५१ हजार १०८ रुपैयाँ गरी जम्मा २० लाख ८ हजार २२१ रुपैयाँ पाएकी हुन् ।
विद्यालयले आफ्नो ऊर्जाशील समय बिताएर अवकाश हुने शिक्षकहरुले खाली हात जान नपरोस् भनेर विभिन्न कोषहरुको व्यवस्था गरेको छ । कर्मचारी संचय कोष, नागरिक कल्याण कोष, शिक्षक कल्याण कोष र अवकाश कोषबाट प्राप्त हुने रकमले सामुदायिक विद्यालयका सरह न्युटन्स् शिक्षकहरु आकर्षक रकम लिएर विदा हुने गरेका छन् ।
न्यूटन्सले यी कोषबाहेक शिक्षकहरुलाई पढाई खर्च, सुत्केरी खर्चलगायतका सुविधा पनि दिँदै आएको छ । शैक्षिक अगुवा रहेका हरिकुमार प्रसाईंले तलदेखिका शिक्षकहरुको मर्मलाई बुझेर चार वटा कोषको व्यवस्था गरेको प्रिन्सिपल हुमागाईंले बताए ।
विद्यालयमा गुणस्तरीय तरिकाले अध्यापन हुने भएकाले विद्यार्थी र अभिभावकको रोजाईमा विद्यालय पर्दै आएको छ । यस वर्ष मात्र २५० जनाभन्दा बढी नयाँ विद्यार्थीहरु भर्ना भएका छन् ।
