झापा शिवसताक्षीका विद्यार्थीहरुले बिजुलीबाट चल्ने मोटरसाइकल निर्माण गरेका छन् ।
शिवसताक्षीको दूधेमा रहेको श्री राष्ट्रिय रमणीय आदर्श माध्यमिक विद्यालयमा कक्षा ९ मा अध्ययनरत तीन विद्यार्थी र स्थानीय क्याम्ब्रिज अंग्रेजी माविमा अध्ययन गर्ने एकजना विद्यार्थीहरु मिलेर इभी मोटरसाइकल निर्माण गरेका हुन् ।
उनीहरुले श्री राष्ट्रिय रमणीय आदर्श मावि ५५ औं वार्षिकोत्सव पारेर उक्त मोटरसाइकल सार्वजनिक गरेका थिए । श्री राष्ट्रिय रमणीय आदर्श माध्यमिक विद्यालयका प्रशन्न दवाडी, सन्देश बराल, निशान शंकर र क्याम्ब्रिज विद्यालय कक्षा ८ मा अध्ययनरत उज्ज्वल घिमिरेले मोटरसाइकल निर्माण गरेका हुन् ।
मोटरसाइकल निर्माण गर्ने चार जना विद्यार्थीहरुलाई दूधे माविका पूर्व प्रधानाध्यापक कालीप्रसाद रिजालले आफ्नो जन्मदिनको अवसर पारेर नगद रकम प्रदान गरेका छन् ।
उनले आफु ६० औ वर्ष पुगेको र जीवनका ३५ औं वर्ष यस विद्यालयमा अध्यापन गराएकाले विद्यालयमा अध्ययनरत इलेक्ट्रोनिक्स मोटर साइकल बनाउने चार जना प्रतिभावान विद्यार्थीहरुलाई प्रोत्साहन स्वरुप जनही ५ हजार र विद्यालयका जेहेन्दार अतिरिक्त क्रियाकलपमा अग्रणी भुमिका खेल्ने विराट लामगादेलाई ५ हजार गरी जम्मा २५ हजार प्रदान गरेका बताए ।
विद्यार्थीहरुले निर्माण गरेको मोटरसाइलमा पुरानो बाइकको चेचिस, पांग्रालगायतको सामाग्रीहरु प्रयोग गरिएको छ । मोटरसाइकलको अगाडी डिक्स ब्रेक र डिजिटल डिस्पेले समेत रहेको विद्यार्थी प्रशन्न दवाडीले बताए । मोटरसाइकल प्रति घण्टा ४७ किलोमिटरको स्पिड सम्म कुदाउन मिल्छ ।
मोटरसाइकल निर्माण गर्न शिवसताक्षी नगरपालिकाले प्रोत्साहन स्वरुप १७ हजार प्रदान गरेको विद्यार्थी सन्देश बरालले जानकारी दिए । मोटरसाइल फुल चार्ज गर्न २ घण्टा लाग्ने सेन्सर सहितको भएको बरालले बताए ।
चार जना विद्यार्थीले गएको वर्ष चार पाङ्ग्रे गाडी समेत निर्माण गरेका थिए । त्यही गाडीको पुराना सामानहरुको सहयोगमा मोटर साइकल निर्माण गरेको उनीहरुको भनाई छ । मोटरसाइकल निर्माण गर्न बस्नेत गृल, रविन सिटी सेन्टरले सहयोग गरेको बताइएको छ ।
मोटरसाइकल सार्वजनिक गर्दा मोटर साइकल निर्माण गर्ने विद्यार्थीहरुलाई शिवसताक्षी नगरपालिकाका नगरप्रमुख मेगाहाङ्ग थोप्राले उनीहरुको कामलाई प्रशंसा गरेका थिए । नगरप्रमुखले उक्त मोटरसाइकल समेत कुदाएका थिए ।
