बर्खा स्मृति प्रतिष्ठान बुद्धशान्तिले आयोजना गरेको दोस्रो संस्करणको झापा जिल्ला अन्तरपालिका टी-२० क्रिकेट प्रतियोगिताको क्वाटरफाइनल समीकरण पूरा भएको छ ।
आज सम्पन्न दुई खेलपछि गौरादह र कचनकवलले क्वाटरफाइनलमा स्थान सुरक्षित गरेका छन् ।
पहिलो खेलमा गौरादहले बुद्धशान्ति गाउँपालिकालाई २४ रनले पराजित गर्दै क्वाटरफाइनलमा प्रबेश गरेको हो । टस हारेर पहिले ब्याटिङ गरेको गौरादहले निर्धारित २० ओभरमा २०३ रनको विशाल लक्ष्य प्रस्तुत गरेको थियो ।
जवाफमा बुद्धशान्तिले ८ विकेट गुमाउँदै १७८ रनमात्र बनाउन सक्यो । गौरादहका लागि सुरज न्यौपानेले ५४ रन र अर्जुन यादवले ५० रनको योगदान दिए ।
बुद्धशान्तिका लागि आदि हाङ फागोले सर्वाधिक ४० रन र कप्तान अर्पण कार्कीले ३४ रन बनाएका थिए । खेलको म्यान अफ द म्याच गौरादहका सुरज न्यौपाने घोषित भए । उनले नगद ३ हजार रुपैयाँ र ट्रफी हात पारेका छन् ।
त्यस्तै आज भएको दोस्रो खेलमा कचनकवलले गौरीगन्जलाई ९ विकेटले पराजित गरेको छ । टस जितेर पहिले ब्याटिङ गरेको गौरीगन्जले १०.५ ओभरमा सबै विकेट गुमाउँदै ४३ रन मात्र बनाउन सकेको थियो ।
कचनकवलका बलरहरूसामु निरीह देखिएको गौरीगन्जका कुनै पनि ब्याट्सम्यानले दोहोरो अंकमा रन जोड्न सकेनन् । ४४ रनको लक्ष्य कचनकवलले ४.२ ओभरमा १ विकेट गुमाउँदै सजिलै पूरा गरेको थियो ।
कचनकवलका लागि दिपेश बोगटीले २ ओभरमा ८ रन खर्चेर ४ विकेट लिएर उत्कृष्ट प्रदर्शन गरे । उनी म्यान अफ द म्याच घोषित हुँदै नगद ३ हजार रुपैयाँ र ट्रफी प्राप्त गर्न सफल भएका छन् ।
भोलिदेखि क्वाटरफाइनलका खेलहरू सुरू हुने जनाएको छ । पहिलो क्वाटरफाइनलमा झापा गाउँपालिका र बिर्तामोड भिड्ने छन् भने दोस्रो खेल कन्काई र भद्रपुर नगरपालिकाबीच हुनेछ ।
प्रतियोगिताको विजेताले नगद १ लाख ५० हजार, मेडल, ट्रफी र प्रमाणपत्र प्राप्त गर्नेछन् भने उपविजेताले नगद ७५ हजारसहित मेडल, ट्रफी र प्रमाणपत्र पाउने अध्यक्ष मदन प्रसाईंले बताए ।
