बुद्धशान्तिमा जारी दोस्रो संस्करणको झापा जिल्ला अन्तरपालिका टि-२० क्रीकेट प्रतियोगिताको उद्घाटन खेलमा दमक नगरपालिकालाई १० विकेटको फराकिलो अन्तरले हराउँदै भद्रपुर नगरपालिका क्वाटरफाइनलमा प्रवेश गरेको छ ।
प्रतिकुल मौसमका कारण आज २० ओभरको खेललाई छोट्याएर १०-१० ओभरमा झारिएको थियो । टस हारेर पहिलो ब्याटिङको निम्तो पाएको दमकले १० ओभरमा ६ विकेट गुमाउँदै भद्रपुरलाई ७५ रनको लक्ष्य दिएको थियो । दमकका लागि संगम बुढाथोकीले १६ बलमा २५ रन जोडे भने सचिन श्रेष्ठले १८ बल खेल्दै २० रन जोडेका थिए ।
भद्रपुरका प्रवेश कामतीले २ ओभर बलिङ गर्दै ९ रन दिएर २ विकेट लिएका थिए ।
त्यस्तै, जवाफी ब्याटिङ गरेको भद्रपुरले ४.४ ओभरमा विना विकेटको क्ष्यतिमा ७५ रनको लक्ष्य प्राप्त गरेको थियो । भद्रपुरका लागि निखिल पौडेलले १९ बलको सामना गर्दै विस्फोटक ५४ रन बनाएका थिए । उत्कृष्ट ब्याटिङ प्रदर्शन गरेका भद्रपुरका पौडेल खेलको प्लेयर अफ दि म्याच घोषित भए । उनले नगद ३ हजार र ट्रफी प्राप्त गरेका छन् ।
त्यसैगरी भोलि बिर्तामोड नगरपालिकाले कमल गाउँपालिकाको सामना गर्नेछ भने सोही दिन कनकाई नगरपालिकाले बाह्रदशी गाउँपालिकाविरुद्ध खेल्नेछ । खेल बुद्धशान्ति-३ स्थित पेट्रोल पम्पछेउको खुला मैदानमा हुनेछ भने प्रतियोगितामा झापाका १५ वटै पालिका सहभागी रहेको बर्खा प्रतिष्ठानका अध्यक्ष मदन प्रसाईंले जानकारी दिए ।
प्रतियोगिताको विजेताले नगद १ लाख ५० हजार, मेडल, ट्रफी, प्रमाणपत्र पाउनेछ भने उपविजेताले नगद ७५ हजार, मेडल, ट्रफी, प्रमाणपत्र पाउने अध्यक्ष प्रसाईंले बताए ।
बर्खा स्मृति प्रतिष्ठानका अध्यक्ष प्रसाईंको अध्यक्षतामा सम्पन्न उद्घाटन सत्रमा बुद्धशान्ति गाउँपालिका अध्यक्ष मनोज प्रसाईंको प्रमुख आतिथ्यता रहेको थियो ।
