झापामा भइरहेको हिसान कप २०८१ ले विद्यालयस्तरको फुटबलमा नयाँ उचाइ हासिल गर्दै आएको छ ।
ग्यालेक्सी स्कुलको ग्राउन्ड भद्रपुर-९ मा जारी प्रतियोगितामा १ देखि १२ कक्षाका विद्यार्थीहरूले आ-आफ्नो विद्यालयको प्रतिनिधित्व गर्दै प्रतिस्पर्धा गरिरहेका छन् ।
यो वर्षको प्रतियोगितामा कुल २३ टोलीले भाग लिएका छन् जसमा बिर्तामोडबाट १० टोली ,मेचीनगर दुई टोली , दमक पाँच टोली, भद्रपुर बाट तीन टोली र अन्य टोली झापाका बिभिन्न पालिकाहरुबाट सहभागीता रहेको हिसान झापाका सचिब देबेन्द्र हुमागाईले जानकारी दिए ।
प्रतियोगिता अन्तरगत छात्रहरूको सोमबारको पहिलो सेमिफाइनल खेलमा निदि स्कुल बिर्तामोडले एसएस निकेतन भद्रपुरलाई पराजित गरेको छ ।
त्यस्तै दोस्रो सेमिफाइनल खेलमा आदर्श स्कुल बिर्तामोडले बाल्मिकीलाई हराउँदै फाइनलमा स्थान बनाएको हो । फाइनल खेल पुस २० गते शनिबार हुनेछ ।
अघिल्लो वर्षको प्रतियोगितामा आदर्श र निदि बीचको प्रतिशोधको एउटा ऐतिहासिक पृष्ठभूमि पनि रहेको छ, जहाँ निदिले आदर्शलाई हराएर च्याम्पियन बनेको थियो ।
त्यसैगरी छात्राहरूको तेस्रो स्थानको लागि भएको खेलमा सिद्धार्थ स्कुल भद्रपुरले बिर्तामोडको निदिलाई ४-० को फराकिलो गोल अन्तरले हराउँदै तेस्रो भएको छ ।
छात्राको फाइनल खेलका लागि यसअघि नै बाल्मिकी बिर्तामोड र ग्लोबल स्कुल दमकले स्थान पक्का गरिसकेका छन् । प्रतियोगिताले झापा जिल्लामा फुटबलको लोकप्रियता र विद्यालयका खेलकुदको विकासमा महत्वपूर्ण योगदान पुर्याउने हिसान झापाका कोषाध्यक्ष रञ्जित शाह बताए ।
