झापाको बिर्तामोड नगरपालिका वडा नम्बर ९ स्थित नमुना टोलमा नव निर्मित आधारभूत स्वास्थ्य केन्द्र भवनको उद्घाटन गरीएको छ ।
नगर प्रमुख पवित्रा महतारा प्रसाईंले रिवन काटेर भवनको उद्धाटन गरेकी हुन् । स्थानीय तोमप्रसाद पाठक र तुलसा पाठकले दान दिएको २ कट्ठा ५ धुर जग्गामा निर्माण गरीएको आधारभुत स्वास्थ्य केन्द्रको उद्घाटन गरीएको हो ।
उक्त कार्यक्रममा बोल्दै नगर प्रमुख पवित्रा महतारा प्रसाईंले यस स्वास्थ्य केन्द्रको लागि जग्गा दिएर पाठक परिवारले पुण्यको काम गरेको बताएकी छन् । सरल र सहज तरीकाले सेवा दिन स्वास्थ्यकर्मीलाई निर्देशन दिँदै नगरप्रमुख प्रसाईंले स्वास्थ्य संस्थाको संरक्षणमा ध्यान दिन सबैलाई आग्रह गरेकी थिइन् ।
सोही अवसरमा जग्गादाता तोमप्रसाद पाठक र तुलसा पाठकलाई नगर प्रमुख प्रसाईंले खादा लगाएर सम्मान गरेकी थिइन् ।
वडा नम्बर ९ का वडाध्यक्ष हरिप्रसाद चौलागाईको अध्यक्षतामा आयोजित भवन उद्घाटन कार्यक्रममा कार्यपालिका सदस्य संगिता सिवा, वडा सदस्य कल्पना राजवंशी, एमाले नेता लक्ष्मी मोते, विष्णुमाया कोइराला लगायतको उपस्थिति रहेको थियो ।
