नेपाल प्रिमियर लिग (एनपीएल) क्रिकेटमा कर्णाली याक्सले चितवन राइनोजलाई हराएको छ ।
आज भएको खेलमा कर्णालीले चितवनलाई ६ विकेटले हराएको हो ।
चितवनले दिएको १ सय ३१ रनको लक्ष्य कर्णालीले अन्तिम बल बाँकी छँदा ४ विकेट गुमाएर भेटाएको छ । कर्णालीका शिखर धवनले ४५ र चादविक वाल्टनलले ३० रन बनाए । चितवनका कप्तान कुशल मल्ल, जान निकोल लोफ्टी एटन र रवि बोपाराले १-१ विकेट लिएका हुन् ।
यसअघि त्रिवि क्रिकेट मैदानमा टस हारेर ब्याटिङको निम्तो पाएको चितवनले २० ओभरमा ७ विकेट गुमाएर १ सय ३० रन बनायो । चितवनका रवि बोपाराले ५९ रन बनाए । कर्णालीका विपिन शर्माले ३ र जीशान मक्सूदले २ विकेट लिएका थिए ।
प्रतियोगितामा कर्णालीको यो पहिलो जीत हो । कर्णाली पहिलो खेलमा जनकपुर बोल्ट्स र दोस्रो खेलमा काठमाडौँ गुर्खाजसँग पराजित भएको थियो भने चितवनले पहिलो हार बेहोरेको छ । चितवनले पहिलो खेलमा काठमाडौँ गुर्खाजलाई र दोस्रो खेलमा पोखरा एभेन्जर्सलाई हराएको थियो ।
एनपीएलमा आजै भएको दोस्रो खेलमा पोखरा एभेन्जर्सले लुम्बिनी लायन्सलाई १० विकेटले हराएको छ ।
लुम्बिनीले दिएको १ सय ७१ रनको लक्ष्य पोखराले एक विकेट पनि नगुमाई १९ बलअघि नै भेटाएको हो ।
पोखराका आन्द्रेस गौसले कीर्तिमानी शतक बनाए । एनपीएलमा पहिलो शतक बनाउने क्रममा आन्द्रेसले ५५ बलमा ५ छक्का र १२ चौकाको मद्दतमा १ सय ४ रन जोडेका हुन् । अमेरिकी ब्याटर आन्द्रेस एनपीएलमा सबैभन्दा कम बलमा अर्धशतक बनाउने खेलाडी पनि बनेका छन् । उनले २० बलमै अधर्शतक बनाए भने पोखराका दिनेश खरेलले ६१ रन बनाए ।
यसअघि कीर्तिपुरको त्रिवि क्रिकेट मैदानमा टस जितेर ब्याटिङ गरेको लुम्बिनीले २० ओभरमा ५ विकेट गुमाएर १ सय ७० रन बनाएको यियो ।
लुम्बिनीका कप्तान रोहित पौडेलले ९५ रन बनाए भने टस मूर्सले ४५ रन बनाए । पोखराका विपिन खत्रीले २ विकेट लिएका हुन् ।
योसँगै पोखराले प्रतियोगितामा पहिलो जीत हात पारेको छ । पोखराले यसअघि लगातार दुई खेल हारेको थियो भने लुम्बिनीले लगातार दोस्रो हार बेहोरेको छ ।
