आईसीसी विश्वकप क्रिकेट लिग-२ को अमेरिकामा भइरहेको शृङ्खलाअन्तर्गत आफ्नो दोस्रो खेलमा नेपालले स्कटल्याण्डलाई पाँच विकेटले हराएको छ ।
अमेरिकाको डालसमा स्कटल्याण्डले दिएको १ सय ५५ रनको लक्ष्य नेपालले २९ ओभर ५ बलमा भेट्टाएको हो । नेपालका आरिफ शेखले सर्वाधिक ५१ रन बनाए भने कुशल भुर्तेल र गुल्सन झाले २५-२५ रन जोडेका थिए । स्कटल्याण्डका ब्राण्डम म्याकुलमले २ विकेट लिएका हुन् ।
त्यसअघि टस जितेर नेपालले फिल्डिङ रोजेपछि पहिला ब्याटिङ गरेको स्कटल्याण्डले ४१ ओभर ४ बलमा सबै विकेट गुमाउँदै १ सय ५४ रन बनाएको थियो । स्कटल्याण्डका मार्क वाटले ३४ रन बनाएका थिए ।
नेपालका सन्दीप लामिछानेले ३ विकेट लिए भने करण केसी, सोमपाल कामी र गुल्सन झाले २-२ विकेट तथा आरिफ शेखले १ विकेट लिएका थिए ।
लिग-२ अन्तर्गत त्रिकोणात्मक शृङ्खलाको पहिलो खेलमा नेपाल घरेलु टोली अमेरिकासँग ३ विकेटले पराजित भएको थियो भने स्कटल्याण्डले अमेरिकालाई १० विकेटले हराएको थियो ।
