झापाको बिर्तामोडमा ‘नेपाल मास्टर्स स्नुकर २०८१’ प्रतियोगिता हुने भएको छ ।
आयोजक संस्था बिर्तामोड स्नुकरले पत्रकार सम्मेलन गरी प्रतियोगिता यही असार १५ गतेदेखि बिर्तामोडमा शुरु हुने र प्रतियोगितामा राष्ट्रिय स्नुकर खेलाडीेसहित स्थानीय खेलाडीको सहभागीता रहने जानकारी दिएको हो ।
कोशी प्रदेशबाट ८ जना, झापाबाट ८ जना र नेपालका टप १६ गरी ३२ जना खेलाडीको सहभागिता रहने बिर्तामोड स्नुकरका प्रकाश लिङ्देनले जानकारी दिए ।
उनका अनुसार प्रतियोतिामा प्रथम हुने खेलाडीलाई २ लाख, फष्ट रनरअपलाई ८० हजार, हाइयस ब्रेकरलाई ५०, म्याक्सिमम ब्रेकरलाई एक लाख ४७ हजार र सेमिफाइनलमा प्रवेश गर्नेलाई २०-२० हजार पुरस्कारसहित ट्रफी प्रदान गरिनेछ ।
प्रतियोगिताका लागि अनुमानित १२ लाख रुपैयाँ खर्च हुने र स्थानीय खेलप्रेमी, सामाजिक संघसंस्थासहित आयोजकले नै खर्च ब्यहोर्ने आयोजक संस्थाले जनाएको छ ।
स्नुकर खेल अन्तर्राष्ट्रियस्तरमा चर्चित खेल भए पनि नेपालमा भने खासै चर्चा नभएकोले उक्त प्रतियोगिताले खेलप्रेमीमाझ चिनाउने लिङ्देनले बताएका छन् ।
बिर्तामोड स्नुकरका तर्फबाट खेम बुढाथोकी, नवल अग्रवाल, चित्रप्रकाश राईलगायतले स्नुकर खेलका बारेमा आ-आफ्नो भनाइ राखेका थिए ।
उक्त पत्रकार सम्मेलनको सञ्चालन आशा गुरुङले गरेकी थिइन् ।
