‘श्री ५’ लेखिएको शिलालेख राखेर पृथ्वीनारायण शाहको शालिक अनावरण गर्न लगाएको बिर्तामोडस्थित इकम कलेजमाथि कारबाही हुने भएको छ ।
कलेजको दर्ता खारेजीको लागि प्रक्रिया अगाडि बढाइने भएको हो । कलेजले बहालवाला राजासरह पूर्वराजा ज्ञानेन्द्र शाहबाट शालिक अनावरण गर्न लगाएको थियो ।
कलेज सञ्चालकले देशमा राजतन्त्र भएजसरी ‘श्री ५ महाराजाधिराज ज्ञानेन्द्र वीर विक्रम शाहको करकलमबाट’ लेखिएको शिलालेख राखेका थिए ।
इकम कलेजले संविधानको ठाडो उल्लंघन गरेकाले दर्ता खारेजीको प्रक्रिया अगाडि बढाइने बिर्तामोड १ का वडा अध्यक्ष अग्निप्रसाद पाण्डेले जानकारी दिए ।
आज इकम कलेजलाई पत्र पठाएर स्पष्टीकरण सोधिने र दर्ता खारेजीका लागि बिर्तामोड नगरपालिकाको शिक्षा शाखालाई अनुरोध गरिने पाण्डेले जानकारी दिए ।
चौतर्फी विरोधपछि इकम कलेजको प्रांगणबाट ‘श्री ५’ लेखिएको शिलालेख हिजो हटाइएको थियो । कलेजका सञ्चालकहरुले आफूहरुबाट त्रुटि भएको स्वीकार गरिसकेका छन् ।
शालिक अनावरण गर्नेक्रममा राखिएको शिलालेखको भाषामा त्रुटि भएको महसुस भएपछि त्यसलाई हिजैै हटाइएको कलेजका संस्थापक अध्यक्ष एवम् सिइओ आलोक कार्कीले बताए ।
उनले दुई–तीन दिनपछि निर्माण हुने अर्को शिलालेखमा ‘श्री ५’ को सट्टा पूर्वराजा भनेर लेखिने जानकारी दिए ।
यसअघि शिलालेखमा ‘श्री ५’ लेखेपछि प्रमुख जिल्ला अधिकारी शिवराम पोखरेलले पनि स्पष्टीकरण सोधेका थिए । त्यसपछि कलेज प्रशासनले शिलालेख हटाएको हो ।
