झापा बिर्तामोडका दयनीय अबस्थामा रहेका लाखबहादुर विश्वकर्मा लाई सहयोग सामाग्री हस्तान्तरण गरिएको छ।
बिर्तामोड नगरपालिका ८ का वडाध्यक्ष अजय कार्कीको अग्रसरतामा बिर्तामोड– ७ स्थित देउनियाको खोलाको बगरमा भत्केको सानो छाप्रोमा अभावमा बाँचिरहेका विश्वकर्माको परिवारले नयाँ वर्षमा घरको छानोका लागि जस्तापाता , सुत्ने खाट , लगाउने लुगाकपडा, जुत्ताचप्पल, खाने खाद्यान्नदेखि चाडपर्व मनाउन मासुसमेत पाएका छन् ।
बिर्तामोड ८ का वडाध्यक्ष कार्कीको अगुवाईमा वडा समितिले विश्वकर्माको घरमै पुगेर २ बन्डेल जस्तापाता,दुईवटा खाट , दुई बोरा चामल,दाल , नून तेल,सिरक , डस्ना , सिरानी ,तन्ना ,लगाउने लुगा , जुत्ताचप्पल , बिस्कुट , चकलेट र पर्व मनाउन मासु समेत वितरण गरेको हो ।
विश्वकर्माको परिवारको लागि सो सामग्री अमेरिकामा रहेका नेपालीहरुले सहयोग गरेका हुन् । पेन्सल्भेनियाका छला खनाल , बन्दना खनाल ,हरि भट्टराई , गंगा चिमरिया ,हरि खनाल, ओहायोका घना खतिवडा र माधव अधिकारीले आर्थिक सहयोग गरेपछि स्थानीयहरुको सहयोगमा उनिहरुलाई सो सामाग्री हस्तान्तरण गरिएको वडाध्यक्ष कार्कीले बताए ।
वडा अध्यक्ष कार्कीले नयाँ वर्ष गरिव असहायलाई सहयोग गर्दा आफूलाई सन्तुष्टि मिलेको बताए । उनले त्यस सहयोगबाट विश्वकर्मा परिवारलाई ठूलो राहत पुग्ने विश्वास व्यक्त गरे ।
कार्यक्रमको अध्यक्षता गरेका निचाझोडा सामुदायिक वन उपभोक्ता समितिका अध्यक्ष बद्री प्याकुरेलले विपन्न विश्वकर्माको परिवारमा पनि नयाँ वर्ष आओस् भनेर आफूहरुले नयाँ वर्षकै दिन सो सहयोग प्रदान गरेको बताए । उनले स्थानीय रमेश कार्कीको पहल र सहयोगमा सो परिवारलाई सहयोग गर्न सफल भएको बताए ।
कार्यक्रममा वडा सदस्यहरु अग्नीप्रसाद सिटौला , सोयालाल राजवंशी , इन्दिरा पाण्डे , लक्ष्मी मैनाली , समाजसेवीहरु रमेश कार्की , कुमार दर्नाललगायतको सहभागिता रहेको थियो । कार्यक्रमको संचालन संचारकर्मी सरोज पौडेलले गरेका थिए ।
लाखबहादुर विश्वकर्मा , उनकी श्रीमती कुमारी विश्वकर्मा , उनीहरुका ७ महिनादेखि १० वर्षका चार छोराले बगरमा रहेको छाप्रोमा आश्रय लिइरहेका छन् ।
