बिर्तामोड–पत्रकार सुब्रत न्यौपानेले जन्मदिनको अवसरमा बिर्तामोड–१० को विराट आधारभूत विद्यालयका लागि बालउपयोगी पुस्तक दिएका छन् । विद्यालयको बाल क्लवका पदाधिकारीलाई पत्रकार न्यौपानेले ती पुस्तक हस्तान्तरण गरेका हुन् । भदौ १२ गते पत्रकार न्यौपानेको जन्मदिन हो । 
विद्यालयले स्थापना गरेको पुस्तकालयका लागि जन्मदिनको अवसरमा बाल उपयोगी पुस्तक हस्तान्तरण गरिएको पत्रकार न्यौपाने बताए । ‘कोर्ष भन्दा बाहिरका बालउपयोगी पुस्तकमा पनि बालबालिकाको ध्यान जानुपर्छ’, पत्रकार न्यौपानेले भने, ‘अनि मात्र उनीहरु थप रचनात्मक बन्न सक्छन् ।’
न्यौपानेले जन्मदिनमा पुस्तक उपलब्ध गराएकोप्रति विद्यालयले खुशी प्रकट गरेको छ । शिक्षक रंगलाल न्यौपानेले जन्मदिनको अवसर पारेर पत्रकार न्यौपानेद्वारा बालबालिकाका लागि उपयोगी किताव दिइनु आफैँमा प्रशंसनीय कार्य भएको बताए ।
बालबालिका तथा शिक्षा सञ्चार मञ्चका अध्यक्ष सरोज पौडेलको संयोजनमा पत्रकार न्यौपानेले उक्त विद्यालयमा ती पुस्तक हस्तान्तरण गरेका हुन् । विद्यालयले स्थापना गरेको पुस्तकालयका लागि दाता महानुभावले पुस्तक उपलब्ध गराउँदै आएका छन् ।
