झापाको मेचीनगर नगरपालिका वडा नं.१२ सहरेडाँगीमा अवस्थित सरस्वती बाल कल्याण माध्यमिक विद्यालयमा शुभकामना आदानप्रदान तथा विद्यार्थी पुनर्मिलन कार्यक्रम सम्पन्न भएको छ ।
बडादशैं, शुभ दिपावली तथा छठको अवसरमा पूर्व विद्यार्थी मञ्चको आयोजनामा भएको कार्यक्रममा विद्यालयमा अध्ययन गरेका पूर्व विद्यार्थीहरुको उपस्थिति रहेको थियो ।
पूर्व विद्यार्थी मञ्चका अध्यक्ष टिकाराम रिजालको अध्यक्षतामा भएको कार्यक्रमको प्रमुख अतिथि विद्यालयका प्रधानाध्यापक शुक्रराज घिमिरे रहेका थिए ।
उक्त अवसरमा उपस्थिति सबैले एकअर्कामा शुभकामना आदानप्रदान गर्दै लामो समयपछिको भेटघाटलाई खुशीमा साटासाट गरेका थिए ।
उक्त अवसरमा प्रमुख अतिथि प्रधानाध्यापक शुक्रराज घिमिरे, शिक्षक अभिभावक संघका अध्यक्ष राजेन्द्र सापकोटा तथा पूर्व विद्यार्थी महेश दाहाल लगायतले शुभकामना मन्तव्य राखेका थिए ।
सोही अवसरमा पूर्व विद्यार्थी मञ्चको विधानलाई सर्वसम्मत पारित समेत गरिएको छ भने विद्यालयको भौतिक संरचना तथा आर्थिक पाटोलाई मजबुत बनाउन अक्षय कोषमा सहयोग तथा सबैसँग आग्रह समेत गर्ने प्रतिबद्धता व्यक्त गरिएको थियो ।
पूर्व विद्यार्थी मञ्चका कोषाध्यक्ष चिरञ्जीवी कोइरालाले मन्तव्यबाट स्वागत गरेको कार्यक्रमको सञ्चालन सचिव गोपाल ढुंगेलले गरेका थिए ।
